KORONADAL CITY – Naglab-ot sa napulo ang pilason sa pagkarambola sang tatlo ka mga salakyan sa national highway, Barangay Silway 7 road, Polomolok, South Cotabato alas-7:50 kagab-i.
Ini ang ginkumpirma ni Police Chief Master Sgt. Marloun Garcia, investigator sang traffic section sang Polomolok Municipal Police Station sa interview sang Bombo Radyo Koronadal.
Suno kay Garcia, gina-involbaran ang disgrasya sang duha ka pick-up kag isa ka elf nga loaded sang mantika.
Naguwa sa imbestigasyon sang mga otoridad nga paguwa na kuntani sa national highway gikan sa Silway 7 ang Toyota Hilux pick-up nga ginamaneho ni James Hernando Pichay, 81 anyos nga residente sang Purok Mabuhay, Barangay Silway 7, Polomolok, South Cotabato apang bangud may nakabalabag nga salakyan sa alagyan sini padulong sa General Santos City nag-u-turn ini.
Sakto man nga may nagapadulong nga Pick-up nga Nissan nga ginamaneho ni Romnick Taburnal,33 anyos kag residente sang Acmonan, Tupi, South Cotabato rason nga nabungguan sini ang una nga behikulo.
Sa kabaskog sang impact, nag-swerve ang Toyota Hilux nga pick up sa pihak nga lane kun diin may nagapadulong nga Isuzu Elf nga ginamaneho sang isa ka Jeffrey Novicio, 32-anyos kag residente sang Barangay GPS, Koronadal City.
Wala na makalikaw ang Elf truck kag nabunggo sa nag-sweve nga pick-up.
Sa kabaskog sang pagkarambola sang mga salakyan lunsay pilason ang driver sang mga ini.
Pila pa sa mga pilason ang tatlo ka pasahero sang Nissan Navarra nga pick up nga ginalakipan nanday: Dona Eve Fetalino,32; Charmaine Fetalino,28 kag Princess Wilmie Fetalino, 30 nga lunsay mga residente sang siyudad sang Koronadal.
Ang apat pa ka mga pilason nga sakay naman sang elf truck ang ginkilala kanday: John Denver Novicio, 26; Dominador Moquindo, 42; Nino Lobrega kag Roel Aclon, 54 nga lunsay mga residente sang Bunawan, Davao City.
Ang nasambit nga mga pilason ang ginpangdala sa nagkalain-lain nga balay-bululngan para sa nagakaigo nga pagbulong.
Sa karon, nagpatigayon na sang clearing operation sa lugar sa diin nagluntad ang aksidente.
Samtang, ginahulat pa sang kapulisan ang pag-atubangay sang mga nainvolbar sa disgarasya agud maathagan ang tanan kag kun sin-o ang magabayad sang damyos.
Kaangot sini, nagpahanumdom ang opisyal sa tanan nga nagamaneho sang salakyan nga maghalong agud makalikaw sa disgrasya sa dalanon.
