Nag-alokar ang Office of the President sang dugang nga ₱20 milyon nga ayuda agud suportaran ang padayon nga rehabilitasyon kag pagbangon sang mga komunidad sa South Cotabato nga naapektuhan sang magnitude 7.8 nga linog.
Ginpahibalo ang dugang nga pondo sa mensahe ni Office of the Special Assistant to the President (OSAP) Undersecretary Atty. Athalia B. Liong, nga nagtambong bilang representante ni Special Assistant to the President Anton Lagdameo Jr. sa pagbukas sang ika-27 nga T’nalak Festival.
Suno kay Liong, ang ayuda ginahatag sa ngalan ni Pangulong Ferdinand R. Marcos Jr. bilang padayon nga suporta sang nasyunal nga gobyerno sa probinsya samtang ginapatuman ang mga programa para sa rehabilitasyon kag pagbangon.
Kadunagn sang selebrasyon sang T’nalak Festival, ginpabug-atan sang mga opisyal ang importansya sang mabaskog nga pagbinuligay sang lokal kag nasyunal nga gobyerno agud mapadasig ang paghatag sang kinahanglanon nga bulig sa mga pamilya nga naapektuhan sang kalamidad.
Samtang, padayon nga ginapalig-on sang Provincial Government of South Cotabato, sa pagpanguna ni Governor Reynaldo S. Tamayo Jr., ang koordinasyon sa nagkalainlain nga mga ahensya sang gobyerno agud mapadasig ang implementasyon sang mga programa para sa relief, rehabilitasyon kag pagbangon sang mga apektado nga komunidad.
Luwas sa pagsaulog sang kultura kag tradisyon sang probinsya, nangin higayon man ang T’nalak Festival agud mapakita ang paghiusa kag pagbinuligay sang gobyerno kag pumuluyo sa pag-atubang sa mga pagtilaw nga gintuga sang linog.
