Naglab-ot sa 17 ka mga armado nga indibidwal kaupod ang isa ka kumander nga boluntaryo nga nagsungka sa tropa sang gobyerno sa Barangay Lagandang, Isulan, Sultan Kudarat.
Suno kay Lt. Col. Tristan Rey Vallescas, pinuno sang 7th Infantry (TAPAT) Battalion, ang pagsungka sang mga armado nga grupo ang resulta sang ginapahugtan nga pagbantay sang kasuldaduhan kag pagsiguro sa seguridad sa lugar nga ginluntaran sang ‘rido’ ukon clan war.
Ginsungka sang mga ini ang ila bitbit nga mga armas nga ginalakipan sang 19 ka mga M16A1, anum ka M14, tatlo ka mga Bushmaster Carbine, isa ka M60 General Purpose Machine Gun, isa ka set sang Cal. 50 heavy machine gun, tatlo ka AK47, isa ka Cal. 30 BAR, isa ka Cal. 50 Rifle, isa ka Uzi M11, isa ka M203 Grenade Launcher, mga magasin, kag bala.
Antes sini, madamo nga mga kagamitan pang-giyera ang nakumpiska sang operating units sang Joint Task Force Central sa ginpatigayon nga pagpatrol sa nasambit nga lugar.
Dugang pa ni Lt. Col. Vallescas nga ang padayon nga pagpatrol sang militar ang resulta sang natukiban nga mga armas kag iban pa nga kagamitan pang-giyera nga gintago sa nabukid nga bahin sang lugar kag sa idalom sang tubig sang mga nagpalagyo nga mga armado nga grupo.
Ang dugang nga mga narekober nga mga kagamitan ang ginalakipan sang tatlo ka RPG, isa ka 60mm Mortar, duha ka Cal.50mm Rifle, siyam ka rounds sang 60mm high explosive, isa ka Tripod para sa Cal.50mm, isa ka round Rifle Grenade, isa ka round RPG 7 Ammo, anum ka rounds sang RPG Ammo Sidik Bomb, isa ka Set Mavic Drone nga may mga accessories, isa ka Bolt para sa Cal.50mm, walo ka Commercial Radios, apat ka Chargers para sa commercial radio, kag mga subersibo nga dokumento/SD Cards.
Ang mga elemento sang 7IB, 1SRB, 64th Division Reconnaissance Company, kag iban pa nga operating units sang Joint Task Force Central ang magapadayon sa pagbantay agud masiguro ang kaluwasn sa lugar.
