-- ADVERTISEMENT --

Nagpangabay sang bulig sa United Nations (UN) ang Ministry of Social Development sa Gaza agud masiguro ang kaluwasan sang mga sibilyan kag malikawan nga madalahig ang mga lugar nga may mga nagaestar nga inosente nga pumuluyo sa padayon nga pag-atake sang Israel.

Ini matapos liwat maglunsyar ang militar sang Israel sang masangkad nga operasyon sa Gaza, nga amo ang una nga dako nga opensiba sa sentral nga bahin sang teritoryo halin sang napirmahan ang ceasefire agreement sang Oktubre 2025.

Gintawag sang Israel Defense Forces ang ila aksyon nga “concentrated operations” sa tatlo ka lugar sa central Gaza, nga suno sa ila, ginapatuman agud madula ang ginapatihan nga mga pamahog batok sa ila mga puwersa.

Apang ginpabutyag sang Hamas ang pagkadismaya kag ginkondenar ang nasambit nga operasyon, nga ila ginakabig nga paglapas sa napagkasunduan nga ceasefire.

Sa tunga sang nagadugang nga tensyon, nagapadayon ang panawagan nga protektahan ang mga sibilyan kag tumanon ang mga kasugtanan agud malikawan ang dugang nga pag-antos sang mga pumuluyo sa Gaza.