Siling nila, crowing glory ang buhok ilabi na sa mga babaye, apang nakakita ka ba bala sang kabayo nga may manami kag laba nga buhok nga daw paryas sa babaye?
Isa ka kabayo nga halin sa Ohio, USA, nga ginangalanan nga Jenny ang nangin sentro sang atensyon matapos makarekord sa Guinness World Records bangud sa iya tuman kalaba ikog.
Ginkilala si Jenny bilang isa ka American Saddlebred, nga lahi sang kabayo nga bantog sa malaba kag matahom nga ikog.
Apang sang bata pa ini, na-utod ang iya ikog kag sang nagtubo liwat kun sa diin naglab-ot na ini sa duta.
Sa baylo nga guntingon, ginpabay-an sang iya tag-iya nga maglaba ini, bangud ang malaba nga ikog isa ka ginapabaloran nga kinaiya sang amo nga lahi, ilabi na sa mga paindis-indis.
Sang ulihi, nakapaminsar sila nga sukaton ang ikog ni Jenny kag tinguhaan nga makasulod sa rekord sang kalibutan.
Nangin rekord-holder ang kabayo nga daw may kaugalingon nga tren sa likod! Apang wala nagdugay ang malaba nga ikog, matapos makumpirmar ang rekord, gin-utod man ang buhok ni Jenny.
Suno kay Lowe, ginapaabot niya nga mangin mas mahapos na para kay Jenny ang pag-atipan sang iya ikog.
Sa katapusan, natuman ni Jenny ang iya misyon: nakakuha sang world record, kag pagkatapos sini, nagpa-haircut man! Kay bisan kabayo, may mga tion gid nga kinahanglan na ang trim!
