Ginakwestiyon ni Bise Presidente Sara Duterte ang numero nga 30,000 nga suno pa nga napatay sa kampanya kontra droga nga ginlunsar sang anay Presidente Rodrigo Duterte.
Gindayaw man sini nga kinahanglan sang mabakod nga ebidensya ukon pamatuod nga nagasuporta sa amo nga numero sang mga napatay, bangod indi pa siya kumbinsido sa amo nga alegasyon kag nagapangayo sang klaro nga datos agud mapamatud-an ang ginasiling nga 30,000 death toll.
Suno kay VP Sara, sa subong, 181 pa lang ka ebidensya ang nabaton kag nasumite sang prosekusyon sa International Criminal Court (ICC) may kaangtanan sa mga kaso sang ginatudlo nga pagpamatay sa drug war.
Gindugang niya nga layo pa ini sa ginapahayag nga linibo ka mga napatay nga ginaangot sa kampanya.
Dugang pa sang Bise Presidente, paano suno pa mapamatud-an ang ginasiling nga 30,000 ka biktima sang drug war kun wala sang kompleto nga listahan sang mga pangalan sang mga napatay kag kung diin nakuha ang amo nga ihap.
Gindayaw man niya nga sa subong, wala pa gani naglab-ut sa 50 ang natiyak ukon nakilala nga biktima.
Sa amo nga numero, 43 pa lang kuno ang kumpirmado nga biktima, nga nagakabig sang 43 counts sang murder, isa ka numero nga layo pa gihapon sa ginahambal sang mga nalista nga 30,000 ka tawo ang napatay sa idalom sang administrasyon.
Sa subong, ang anay Presidente Rodrigo Duterte ang nagaatubang sang kaso nga crime against humanity sa International Criminal Court (ICC) may kaangtanan sa iya kampanya kontra droga.
Padayon naman nga nagatipon sang impormasyon ang ICC agud nga opisyal nga imbestigahan kag litison si anay Presidnte Duterte may angot sa ginatudlo nga paglapas sa Karapatan sang tawo.
