Ginalauman sang United States Department of Agriculture nga magsaka ang rice imports sang Pilipinas sa 5.1 milyon metric tons sa 2026-2027, mas mataas sang 15.9% kumpara sang nagligad nga tuig, bangud kulang ang lokal nga produksiyon agud matabunan ang demand.
Samtang, ginabulubanta nga magsaka lamang sang 0.4% sa 19.68 milyon metric tons ang produksyon sang humay, nga equivalent sang 12.398 milyon MT nga bugas base sa datos sang Philippine Statistics Authority nga malayo sa ginaproject nga konsumo nga 17.65 milyon MT.
Ginpahayag nga ang pagsaka sang populasyon ang padayon nga nagaduso sang demand, samtang ang mataas nga gasto sa abono kag petrolyo nga nagapugong sa mas dako nga produksiyon.
Gindugang man nga ang price-indexed tariff system (15%–35%) kag nagligad nga rice import ban mahimo makaapekto sa suplay kag presyo, samtang may mga panawagan nga ibalik ang 35% tariff agud maproteheran ang lokal nga industriya.
