Ginhayag lamang sang isyu sang online voting sa Senado kon sin-o nga mga senador ang para sa pumuluyo kag kun sin-o ang naga-una sang ila kaugalingon nga interes.
Ini ang pahayag sang Malacañang matapos nga nag-walk out ang minority bloc bilang protesta sa proposal nga pahanugutan ang mga senador nga makaboto online sa tion sang sesyon sang senado.
Suno kay Palace Press Officer Claire Castro, maayo naman ang ginapatuman nga pagsulundan sa senado kag luyag lang sang iban nga bag-uhon ini.
Ginsambit man ni Castro ang pahayag ni Senador Alan Peter Cayetano nga may “justifiable reason” si Senador Ronald “Bato” dela Rosa sa indi pagsulod sa senado bangud sa kahadlok nga madakpan.Bangud sini, ginpahayag ni Castro nga isa ini ka oportunidad para makita sang publiko kun matuod nga nagaserbisyo ang mga lideres sa pumuluyo ukon sa ila lang kaugalingon.
Kadungan sini, nagapati man si Castro nga sarang magamit ang online voting agud makalikaw sa otoridad para sa mga senador nga nagapangatubang sang kaso.
Gin-athag sang Malacañang nga wala nagapahilabot si Presidente Ferdinand Marcos, Jr. sa isyu bangud sa separation of powers sa tunga sang ehekutibo kag lehislatura.
