Nag-abot na ang una nga shipment sang imported diesel sang gobyerno sang Huwebes, Marso 26, 2026, bilang kabahin sang tikang agud mapalig-on ang suplay sang gatong kag mapunggan ang epekto sang nagabag-o nga presyo sini sa lokal nga merkado.
Suno sa Department of Energy (DOE), masobra 22.5 milyong litro ukon 142,000 ka bariles sang diesel ang ila nabaton, nga kabahin sang plano nga pabaskugon ang reserba sang enerhiya sang pungsod.
Ginpatigayon ini suno sa direktiba ni Presidente Ferdinand Marcos Jr. sa idalom sang Executive Order No. 110, nga nagtukod sang Emergency Energy Security Program.
Ginlatag sang programa nga proteheran ang mga kunsumidor kag industriya batok sa gulpi nga pagsaka sang presyo sang gatong sa kalibutan paagi sa pagdugang sang lokal nga imbentaryo sang gatong.
Ginpanindugan ni Energy Secretary Sharon Garin nga padayon nila ginamonitor ang suplay sang gatong agud masiguro nga indi madelantar ang transportasyon kag kalakalan sa pungsod.
Ginadumalaan sang Philippine National Oil Company kag PNOC Exploration Corp., ang pagbakal kag pagdala sang diesel nga ginmanduan nga siguraduhon ang maayo nga implementasyon sang programa.
Target sang gobyerno nga maka-tipon sang tubtob 2 milyon nga bariles sang dugang nga fuel bilang reserba, nga magserbi nga proteksyon batok sa posible nga kakulang sang suplay.
Samtang, wala ginpahayag sang ahensya ang kabug-usan nga balor sang shipment, apang ginpasangkad sang DOE nga mas importante ang accessibility sang fuel para sa publiko sa tunga sang presyur sa global oil prices.
