-- ADVERTISEMENT --

Nagapanawagan sang dugang nga suporta sa lokal nga panguluhan ang mga traysikol driver sa Koronadal City bangud sa limitado nga kita kag padayon nga pagsaka sang presyo sang gasolina kag mga nagapanguna nga kinahanglanon.

Sa interview sang Bombo Radyo Koronadal ginpahayag ni Rex Cabrera, traysikol driver sa syudad, nga apesar may pagnubo sa presyo sang produkto nga petrolyo, indi gihapon ini nagahatag sang daku nga katawhayan bangud mas mataas pa ang presyo sang gasolina kon ikumparar sa nagligad nga regular nga presyo sini.

Ginpahayag ni Cabrera nga sa P600 nga gross income kada adlaw, ginakaltas ang P250 nga boundary kag kapin P200 nga panggasolina, gani kapin P150 na lamang ang mabilin para sa iban nga gastuhon sang pamilya.

Dugang pa niya, daku ang epekto sang pagsaka sang presyo sang mga balaklon, gani kinahanglan nila nga hugtan ang pag-budget bangud ang P1,000 nga kwarta indi na bastante para sa madamo nga kinahanglanon.

Sa pihak nga bahin, ginpahayag man niya nga wala pa sila nagapreparar sing espesyal para sa Paskwa bangud mas ginaprioridad nila ang adlaw-adlaw nga pagkaon kag kinahanglanon sang panimalay.

Para sa iya, dapat adlaw-adlaw nga ginakabuhi ang mga pagtulun-an ni Kristo kag indi lamang sa tion sang Paskwa.

Nagapanawagan man si Cabrera sa gobyerno nga masiguro nga makaabot sa nagakinahanglan ang mga ayuda kag matuman ang ginpromisa nga fuel subsidy sang syudad para sa mga traysikol driver agud mabuligan sila sa adlaw-adlaw nga gastuhon.