Isa ka red-shouldered hawk sa Virginia, Estados Unidos ang ginabulong matapos masapwan nga indi na makalupad kag nagahigda na lamang sa dalan bangod sa sobra nga kabug-aton.
Una nga gindudahan sang mga personahe sang Southwest Virginia Wildlife Center nga may balatian ukon pilas ang pispis, apang napamatud-an sa X-ray kag pag-usisa sang dugo nga wala ini sing pilas.
Suno kay Katherine McGrath, direktor sang operasyon sang wildlife center, nadayagnos nga may obesity ang hawk matapos mag-abot sa 910 ka gramo ang kabug-aton sini, nga halos doble sang kinaandan nga kabug-aton sang amo nga klase sang pispis.
Natukiban man nga kinaandan na sini ang pagpangayam sang mga manok nga ginatipigan sang mga pumuluyo sa palibot, rason nga may mga manok nga nadula sa ila mga tag-iya.
Sa karon, ginahatagan ini sang nagakaigo nga bulong kag ginapatumanan sang estrikto nga pagkaon kag ehersisyo agud mapanubo ang kabug-aton.
Ginalauman nga makabalik ini sa iya natural nga puluy-an sa kamingawan sa sulod sang pila ka semana.







