Ginpabaskog ni Presidente Ferdinand Marcos Jr. ang panawagan para sa paghiusa kag pagbinuligay sang 11 ka pungsod nga miyembro sang Association of Southeast Asian Nations (ASEAN) sa pagbukas sang ika-49 nga ASEAN Summit sini nga Domingo.
Sa iya pamulong, ginpahayag ni Marcos nga bisan lain-lain ang kadakuon, maragtas kag kultura sang tagsa ka pungsod, kinahanglan nga magbinuligay ang mga ini para sa isa ka tingob nga palaabuton sang rehiyon.
Ginpahayag man sini nga ang pre-Hispanic nga balangay boat sa logo sang summit nagasimbolo sang tingob nga pagpanaw sang mga pungsod padulong sa isa ka katuyuan.
Gintumod man sang Presidente ang nagkalain-lain nga pagpanghangkat nga gin-atubang sang rehiyon, lakip ang tensyon sa tunga sang mga pungsod, kawalay kasiguruhan sa ekonomiya, pag-uswag sang teknolohiya, pagbag-o sang klima kag nagadamo nga peligro sa kalibutan.
Lakip man sa iya ginpabutyag ang epekto sang krisis sa Middle East, ilabi na sa kahimtangan sang mga mamumugon sang ASEAN sa iban nga pungsod kag sa posible nga pagsamok sa suplay sang gatong.
Bisan pa sini, ginpili sang mga lider sang ASEAN nga ipadayon ang summit, bangod suno kay Marcos, mas kinahanglan ang paghiusa kag pagbinuligay sang rehiyon sa tunga sang mga krisis.
Antes ang pagbukas sang summit, nag-abi-abi man si Marcos, upod ang First Lady Liza Araneta-Marcos, sa mga lider sang nagkalain-lain nga pungsod sa Philippine International Convention Center sa Pasay City.













