-- ADVERTISEMENT --

Ginkalipay sang isa ka traffic enforcer sa Koronadal City ang pagsunod sang iya suki nga gasolinahan sa husto nga pagpatuman sang mga pagbag-o sa presyo sang petrolyo, lakip na ang oil price rollback kag price hike.

Sa interview sang Bombo Radyo Koronadal ginpahayag ni Martin Buscagan, base sa iya personal nga eksperyensya, nagapanubo sang presyo sang gasolina ang nasambit nga gasolinahan nga nahamtang sa Bo. 7 Syudad sang Koronadal kon may rollback kag wala man siya nakatulopangod sang sobra nga pagsaka sang presyo kon may oil price hike.

Suno pa sa iya, dako nga bulig ini sa mga motorista, ilabi na sa mga nagagamit sang ila salakyan adlaw-adlaw kag sa mga nagasalig sa motorsiklo bilang pangabuhian.

Tungod sini, nanawagan si Buscagan sa iban pa nga gasolinahan sa siyudad nga mangin matinlo kag responsable sa pagpatuman sang mga pagbag-o sa presyo sang petrolyo, agud masiguro nga makabaton sang nagakaigo nga benepisyo ang mga konsumidor.

Gindugang niya nga importante nga masunod sang mga fuel retailers ang ginapatuman nga presyo kag mangin transparent sa ila mga transaksyon, agud mapabilin ang pagsalig sang publiko kag malikawan ang indi kinahanglanon nga dugang nga gasto sang mga motorista.