Ginpanawagan ni Pope Leo XIV ang mas malig-on nga pagbuligay sang Simbahang Katolika kag nagkalain-lain nga organisasyon agud masiguro ang kaayuhan kag proteksyon sang mga migrante, refugee kag mga persona nga nagabalik sa ila tagsa ka pungsod.
Sa iya mensahe para sa Plenary Meeting sang International Catholic Commission for Migration, ginpabug-atan sang Santo Papa nga dapat respetuhon kag proteheran ang kinaiya nga dignidad kag kinamatarong sang kada persona, bisan ano pa ang ila kahimtangan ukon ginhalinan.
Gin-awhag man niya ang mga delegado nga palig-unon ang kooperasyon upod sa mga relihiyoso nga organisasyon kag civil society groups agud mapauswag ang mga programa nga nagahatag sang bulig kag proteksyon sa mga nagapangita sang mas maayo kag mas luwas nga kabuhi.
Dugang pa sang Santo Papa, kinahanglan mangita sang bag-o kag mas epektibo nga mga pamaagi agud maproteheran mga kabataan nga napilitan magbiya sa ila mga puluy-an bangud sang mga inaway kag kalamidad.
Ginpadako man sini ang importansya sang paghatag sang suporta kag pag-atipan sa mga vulnerable nga sektor nga nagaatubang sang kabudlayan bangud sang pagbalhin sa iban nga lugar ukon pungsod.
