-- ADVERTISEMENT --

Matigdas nga ginkondena sang Muslim World League (MWL) ang pag-atake sang Israel sa Nasser Medical Complex sa Gaza nga nagresulta sa kamatayon sang anum ka tawo, lakip ang mga doktor, samtang may pila pa nga napilasan.

Sa opisyal nga pahayag sang organisasyon, ginpahayag nila nga indi makatarunganon ang pagtarget sa mga tolda nga ginaistaran sang mga sibilyan kag ang padayon nga pagpugong sa pagsulod sang humanitarian aid para sa mga apektado sang krisis.

Suno kay Mohammed bin Abdulkarim Al-Issa, Secretary-General sang MWL, indi dapat pasugtan ang amo nga mga paglapas kag kinahanglan ini matigdas nga kondenahon.

Ginpatin-aw man sang organisasyon ang importansya sang pagproteheran sa mga sibilyan kag mga medical personnel, ilabi na sa tunga sang nagapadayon nga kagamo sa Gaza.

Ginpahayag sang MWL nga kinahanglan masiguro ang paghatag sang bulig makatawhanon sa mga tawo nga nagakinahanglan sang pagkaon, bulong kag iban pa nga kinahanglanon.