Ginakusaran sang Taiwan ang Kenya nga nagapasakop sa “presyur sang China” matapos gin-alegar nga ginpunggan sang mga otoridad sang Kenya ang mga opisyal sang Taiwan sa pag-upod sa Our Ocean Conference nga ginhiwat sa Mombasa sini nga semana.
Suno kay Taiwan Ocean Affairs Council Minister Kuan Bi-ling, duha ka delegado sang Taiwan ang temporaryo nga ginpunggan sang mga awtoridad sang Kenya bisan pa nga opisyal sila nga gin-imbitar sa internasyonal nga kumperensya.
Ginsiling naman ni Taiwan Foreign Minister Lin Chia-lung nga ang aksyon sang Kenya resulta sang mataas nga lebel sang presyur halin sa China.
Ginpahayag ni Lin nga nakabayad na ang Taiwan para sa ila exhibition booth kag opisyal nga gin-imbitar sa forum, apang ginpalapad suno pa sang Kenya ang paglikaw sini sa One China Policy agud mapunggan ang partisipasyon sang Taiwan.
Nagprotesta ang Taiwan sa natabo kag nagpahayag nga padayon nga nagadugang ang impluwensya sang China sa pagduso sa iban nga mga pungsod nga limitahan ang pagpakigbahin sang Taiwan sa mga internasyonal nga organisasyon kag mga kalihukan.
Madumduman nga ginakabig sang China nga kabahin sang iya teritoryo ang Taiwan kag nagakontra ini sa bisan ano nga opisyal nga pakig-angot sang isla sa iban nga mga pungsod kag world organization.
