Malinong kag generally peaceful ang kabug-usan nga pag-obserbar sang Todos los Santos kag Pista Minatay 2026 sa Koronadal City, matapos wala sang natabo nga seryoso nga insidente sa nagkalain-lain nga mga sementeryo sa syudad.
Ini ang ginkumpirmar ni Police Lieutenant Colonel Harold Cornel, Chief of Police sang Koronadal City Police Station, sa interview sang Bombo Radyo Koronadal.
Suno kay Cornel, bisan madamo ang nagbisita sa mga sementeryo agud magpangamuyo kag magdumdom sa ila mga napatay nga hinigugma, nagpabilin nga hapsay kag malinong ang sitwasyon sa bilog nga tion sang selebrasyon.
Apang, ginpahayag man sang hepe nga mas madamo ang naobserbahan nga mga nagbisita sa mga sementeryo sang nagligad nga tuig kon ikumparar sa subong nga 2026.
Gindugang pa niya nga kabahin sa positibo nga assessment sang kapulisan ang wala sang pagkumpiskar ukon pagkadakop nga may kaangtanan sa ginadumilian nga mga butang kag kagamitan nga ginadala sang mga nagabisita.
May yara lamang sang isa ka minor nga insidente nga naatubang sang kapulisan sang Nobyembre 1, kun sa diin ginbuligan nila ang isa ka tigulang upod ang iya mga kaapuhan nga na-stranded sa sulod sang sementeryo bangod sa mabaskog nga pagbunok sang ulan sa syudad.
Gilayon naman nga naghatag sang bulig ang mga pulis agud masiguro ang kaluwasan sang nasambit nga pamilya.
Sa kabug-usan, ginpahayag ni Cornel ang iya pagpasalamat kag kalipay sa nangin resulta sang pag-obserbar sang Todos los Santos kag Pista Minatay bangod wala sang seryoso ukon indi maayo nga insidente nga nakagamo sa pagdumdom kag pagpasidungog sang mga pumuluyo sa ila mga nagtaliwan nga hinigugma.
