Nagpagwa sang mga hotline ang Philippine National Police (PNP) agud mapadasig ang pagpangita kag pag-aresto kay Senador Ronald “Bato” dela Rosa, samtang gin-awhag ang publiko nga maghatag sang impormasyon nga makabulig sa ila operasyon.
Suno kay PNP Public Information Office chief Col. Allen Rae Co, mahimo magpaabot ang publiko sang ila nahibaluan nga impormasyon paagi sa mga hotlines nga ginlunsar sang ahensya agud mabuligan ang mga otoridad sa pagpangita sa senador.
Padayon ang pagpangita sang kapulisan kay Dela Rosa, apang suno kay Co, mas maayo kon boluntaryo nga magsurender ang senador agud malikawan ang posible nga madugo nga engkuwentro.
Ginpaandaman man sang opisyal ang mga prank caller nga nagahatag sang indi matuod nga impormasyon, bangud mahimo sila pasakaan sang kaso.
Ginpamatuod man ni Co nga may bastante nga puwersa ang PNP para ipadayon ang pagpangita sa senador.
Suno sa report, ang ulihi nga pagkakita kay Dela Rosa sa publiko amo sang Mayo, kag halin sadto wala na siya makita sa publiko.
Sa Nobyembre, magaisá na ka tuig halin sang nagpagwa ang International Criminal Court (ICC) sang warrant of arrest batok sa senador, nga ginadugtong sa kaso nga crime against humanity may kaangtanan sa kampanya kontra droga sang anay presidente Rodrigo Duterte. Sa amo nga administrasyon, nangin hepe man sang PNP si Dela Rosa.
