“NAKAKITA KO SANG PARI NGA PUGOT ULO!”
Ini ang ginpakigbahin ni Manong Rexan, nga tatlo na ka tuig nga nagapangabuhi paagi sa pagpanlimpyo kag pagpintura sang mga pantiyon sa Koronadal City Public Cemetery.
Suno kay Manong Rexan, magluwas sini, madamo pa sang makatilingala nga butang ang iya na-esksperiensiyahan apang nagapadayon gihapon siya para maka-income bangud sa sini nga tion lamang sila makaganar sang medyo dako.
Kalakip sa ila ginahatag nga serbisyo sini ang pagpala kag pagkakas sang mga nagatipon nga duta sa ibabaw sang mga pantiyon, pagpanlimpyo sang palibot kag pagpintura agud mangin matinlo kag maayong tan-awon ang lulubngan sang mga pinalangga nga napatay.
P300 tubtob P500 ang bayad sa pagpanlimpyo kag pagpala sang mga natabunan sang duta nga pantiyon. Amo man ini ang presyo sang pagpintura nga nagadepende sa kadakuon kag kalaparon sang pantiyon.
Samtang, ginpakigbahin man ni Manong Rexan ang isa ka indi kinaandan nga eksperyensya nga iya naagyan samtang nagatrabaho sa sulod sang sementeryo kon gab-i.
Suno sa iya, nakakita siya sang isa ka persona nga nagasuksok sang sotana apang wala sang ulo. Tungod sa iya bayo, abi niya pari ang iya nakita.
Apang sa pihak sang sini nga makakululba nga eksperyensya, padayon gihapon si Manong Rexan kag ang iya mga kaupdanan sa pagpangabudlay sa sulod sang sementeryo agud makakita sang pang-adlaw-adlaw nga kita, ilabi na subong nga nagadamo ang mga tawo nga nagabisita kag nagadumdom sa ila mga pinalangga nga napatay.
