Kapin 8,700 na ka indibidwal ang nakabaton sang nagkalain-lain nga bulig medikal halin sa Philippine Red Cross (PRC) sa bug-os nga pungsod, samtang nagapadayon ang ila nationwide Undas Operation 2026 tubtob alas-9 sang aga sang Nobyembre 2.
Sa datos sang PRC, 8,721 ka indibidwal ang nakabaton sang vital signs monitoring, samtang 359 ang ginbuligan sa minor medical cases pareho sang pagkahilo kag mga pilas.
May 19 man ka major medical cases nga naitala, kag siyam ka pasyente ang gindala sa ospital bangud sang seryoso nga kondisyon, lakip na ang stroke kag cardiac arrest.
Nakahatag man ang organisasyon sang 297 ka welfare assistance, nga nagalakip sang psychological first aid, pagpanagtag sang pagkaon kag tubig, kag wheelchair assistance.
Agud masiguro ang madasig nga pagtapna sa mga emerhensya, nagdeploy ang PRC sang kabug-osan nga 1,977 ka personnel, nga ginalakipan sang 132 ka staff kag 1,845 ka volunteers.
Nagapabilin man nga nakaantabay ang 73 ka ambulansya, 404 ka first aid stations, 131 ka welfare desks kag 45 ka foot patrol teams, upod ang iban pa nga rescue assets.
Ginpahamtang ang ila mga rescue team sa 349 ka sementeryo, 17 ka bus terminal, siyam ka pantalan kag duha ka airport, lakip na ang iban pa nga matawo nga lugar sa pungsod.
Magapadayon ang Undas Operation 2026 sang PRC tubtob Nobyembre 3 agud masiguro ang seguridad kag madasig nga paghatag sang bulig sa mga nagabisita sa lulubngan sang ila mga pinalangga kag sa mga nagabiyahe sa sini nga tion sang Undas.
