Nagapadayon ang pagdeploy sang mga katapo sang South Cotabato Police Provincial Office (SCPPO) sa nagkalain-lain nga sementeryo kag mga resort sa probinsya agud masiguro ang seguridad sang publiko sa pag-obserbar sang Pista Minatay.
Suno kay PCOL Isralene Z. Lauren, Acting Provincial Director sang SCPPO, yara gihapon sa full alert status ang bug-os nga probinsya sang South Cotabato bilang kabahin sang seguridad sa Nobyembre 2.
Sa interview sang Bombo Radyo Koronadal, ginpahayag ni PCol Lauren nga padayon ang koordinasyon sang kapulisan sa mga force multipliers kag Barangay Peacekeeping Action Teams (BPAT) nga nagabulig sa pagbantay kag pagmonitor sa nagkalain-lain nga lugar.
Nagpasalamat man ang opisyal sa mga boluntaryo nga naghatag sang ila serbisyo agud mapabilin ang kalinong kag seguridad sang mga pumuluyo kag bisita.
Ginpahayag man niya nga magapadayon ang police visibility, monitoring kag deployment tubtob sa masunod nga mga adlaw agud malikawan ang bisan ano nga insidente.
Sa pihak sini, ginapanawagan ni Lauren ang publiko nga magsunod sa mga pagsulundan sang mga awtoridad kag likawan ang pagdala ukon paghimo sang mga butang nga mahimo magtuga sang peligro sa iban nga nagabisita sa mga sementeryo.
