May kaugalingon nga pamaagi ang mga residente sa Spain sa pagdumdom sa ila mga pinalangga nga napatay, nga ginahimo nga masadya kag mabuhi ang selebrasyon sang All Saints’ Day ukon Todos Los Santos.
Nagasugod na ang selebrasyon sang Oktubre 31 paagi sa mga costume party, kun sa diin nagasuksok ang mga residente sang makahaladlok nga mga kostyum kag maskara bilang kabahin sang ila tradisyon.
Holiday man sa Spain ang Nobyembre 1 kag 2 agud mahatagan sang tion ang mga pamilya nga magbisita sa lulubngan sang ila mga pinalangga kag maghalad sang mga bulak.
May yara man sang pagtililipon ang mga pamilya, apang wala sang espesyal nga pagkaon nga ginahanda para sa okasyon, indi kaangay sa Pilipinas nga kinaandan ang pagpreparar sang mga kakanin kada Undas.
Wala man sang mga residente nga nagadala ukon nagahalad sang pagkaon sa mga sementeryo.
