Ginapaabot nga maglala pa ang kondisyon sang kakulang sang ulan sa Pilipinas sa masunod nga mga bulan, kag posible nga 79 ka probinsya sa pungsod ang maapektuhan sang drought lakip na ang South Cotabato sa katapusan sang Marso, suno sa impormasyon sang Philippine Atmospheric, Geophysical and Astronomical Services Administration (PAGASA).
Sa interview sang Bombo Radyo Koronadal, ginpaathag ni Elias O. Diamante Jr., IPM/DRRM Focal Person sang Office of the Provincial Agriculturist, nga may tatlo ka kategorya ang kondisyon sang kakulang sang ulan, base sa kadugayon sang magkasunod nga mga bulan nga nagarekord sang mas manubo sa normal nga pag-ulan.
Suno kay Diamante, ang dry condition nagakatabo kun may duha ka magkasunod nga bulan nga ang pag-ulan yara sa idalom sang normal nga lebel.
Ang dry spell naman nagakatabo kun tatlo ka magkasunod nga bulan nga kulang ang pag-ulan, samtang ang drought nagatuhoy sa lima ka magkasunod nga outh Cotabato, lakip sa 79 ka probinsya nga posible maeksperyensyahan sang tuman nga kakulang sang ulan sa katapusan sang Marso – Office of the Provincial Agriculturistbulan nga may mas manubo sa normal nga pag-ulan.
Sandig sa datos sang PAGASA nga iya ginpaathag, sa katapusan sang Disyembre, posible nga magsulod sa dry condition ang mga apektado nga lugar.
Sa Enero tubtob Pebrero, mahimo naman nga mag-eksperyensya ang mga ini sang dry spell, antes maglab-ot sa drought category sa katapusan sang Marso.
Ginapaabot nga sa amo nga tion, 84 ka probinsya ang mahimo maapektuhan sang nagalawig nga kakulang sang ulan, kag 79 sa mga ini ang mahimo mag-atubang sang drought, lakip na ang South Cotabato.
Apang, ginpahayag man nga mahimo gihapon makabaton sang pag-ulan ang pila ka bahin sang pungsod bangud sa presensya sang easterlies, ukon mga hangin nga nagahalin sa sidlangan.
Bisan pa sini, importante nga padayon nga bantayan ang kondisyon sang panahon kag ang mga advisory sang PAGASA bangud ang nagalawig nga kakulang sang ulan mahimo makaapekto sa sektor sang agrikultura, ilabi na sa mga pananom kag suplay sang tubig sa mga apektado nga lugar.
