Magsulod sa Philippine Area of Responsibility (PAR) subong nga adlaw ang bagyo nga may international name nga Saudel kag pagahatagan ini sang lokal nga ngalan nga Obet, suno sa Philippine Atmospheric, Geophysical and Astronomical Services Administration (PAGASA).
Kun makasulod sa PAR, mangin ika-15 nga tropical cyclone ini nga nagaabot sa Pilipinas sini nga tuig kag ika-apat naman sini nga bulan, kasunod sang Luis, Maymay kag Neneng.
Ginapaabot nga magkusog pa ang bagyo kag mahimo magtupa sa super typhoon strength, bisan lip-ot lamang ang iya pag-agi sa PAR kag posible nga magwa sa masunod nga adlaw.
Bisan sini, posible nga mapabakod sini ang habagat kag magdala sang pag-ulan sa pila ka bahin sang pungsod.
Nagahulag sang kabaskog nga 165 kilometro kada oras kag bugso nga tubtob 205 kilometro kada oras ang Saudel, samtang nagapadul-ong ini pa-northwest sa 30 kilometro kada oras.
Ang sentro sini yara sa 1,950 kilometro sa sidlangan sang Extreme Northern Luzon base sa pinakabag-o nga weather bulletin.
Samtang, nagapabilin sa gwa sang PAR ang Neneng, nga yara 520 kilometro sa amihanan sang Itbayat, Batanes, kag indi na ginapaabot nga magsulod liwat sa Philippine territory.
May isa pa ka tropical depression nga yara sa sidlangan sang Southeastern Luzon, apang indi man ini ginapaabot nga magsulod sa PAR bangud nagahulag ini pa-east-northeast.
