Ginbasura ni anay Senador Antonio Trillanes IV bilang isa lamang ka palusot ang paandam ni Interior Secretary Jonvic Remulla nga posible magdangat sa 10,000 ang patay kon pwersahon ang pagdakop kay Senador Ronald “Bato” dela Rosa.
Sa exclusive interview sang Bombo Radyo Philippines kay Trillanes, ginpahayag sini nga daw ginagamit lamang ni Remulla ang posibilidad sang maduguon nga komprontasyon agud ipakamatarong ang wala pa pagtuman sang arrest warrant batok kay Dela Rosa.
Suno kay Trillanes, bilang hepe sang Department of the Interior and Local Government nga nagadumala sa Philippine National Police, dapat sarang malab-ot sang mga otoridad ang bisan diin nga lugar sa pungsod agud matuman ang ila katungdanan.
Ginduhaduhaan man sini ang presensya sang daku kag makusog nga armado nga grupo nga mahimo magbalabag sa pagdakop kay Dela Rosa. Ginpahayag niya nga wala sang grupo nga nagahatag sang panaguan sa senador, kag ang lugar nga ginatambayan sini yara lamang sa idalom sang impluwensya sang isa ka kilala nga politikal nga makusog sa amo nga lugar.
Apang gin-athag ni Trillanes nga indi ini nagakahulugan nga aktibo nga magakontra sa operasyon ang amo nga indibidwal ukon grupo, ilabi na kon ang PNP kag Armed Forces of the Philippines na ang magpatigayon sini.
Madumduman nga una nga ginpahayag ni Remulla nga yara sa Mindanao si Dela Rosa kag ginaprotektahan sang isa ka gamhanan nga armado nga grupo. Gani, ginapili sang gobyerno ang negosasyon agud malikawan ang posible nga pagpaagay sang dugo.
Si Dela Rosa ang gin-isyu-an sang arrest warrant sang International Criminal Court may kaangtanan sa kaso nga krimen batok sa katawhan nga nagasentro sa maduguon nga kampanya kontra droga sa administrasyon ni anay Presidente Rodrigo Duterte.
