-- ADVERTISEMENT --

Nagpanawagan ang isa ka residente nga dapat ebidensya kag indi politika ang mangin basehan sa paghusga sa impeachment case batok kay Vice President Sara Duterte.

Sa interview sang Bombo Radyo Koronadal, ginpahayag ni Toto nga kinahanglan nga maghatag ang Bise Presidente sang klaro nga pagpaathag nahanongod sa ginapatihan nga madamo niya nga kuwarta kag kon paano ini nagakabagay sa iya nadeklarar nga income.

Dugang man niya ang mga transaksyon nga suno sa iya kinahanglan pa usisaon, lakip ang posible nga money laundering, apang ginpabutyag nga dapat ini suportahan sang konkreto nga ebidensya.

Gindugang man ni Toto nga indi siya nagakampi sa administrasyon ni Presidente Ferdinand Marcos Jr. ukon sa bisan sin-o nga politikal nga grupo, bangod para sa iya, dapat manabat sa kasuguan ang bisan sin-o nga opisyal kon mapamatud-an nga nakahimo sang paglapas.

Dugang pa niya, importante nga magbase sa mga ebidensya nga ipresentar ang mga senador sa ila pagdesisyon sa impeachment proceedings.

Gani, gin-awhag niya ang publiko nga maglikaw sa politikal nga nagadampig kag maghimo sang matarong nga paghukom base sa kamatuoran kag ebidensya.