-- ADVERTISEMENT --

Nagaprioridad ang Armed Forces of the Philippines (AFP) sa pag-angkon sang dugang nga missile systems kag iban pa nga armas agud mapabakod ang territorial defense sang pungsod.

Suno kay AFP Chief Gen. Antonio Nafarrete, kabahin ini sang ila plano nga mapauswag ang kapasidad sang militar sa pag-atubang sa posible nga mga banta, lakip ang padayon nga presensya sang mga barko sang Chinese People’s Liberation Army (PLA) sa rehiyon.

Ginpahayag niya nga naga-focus ang AFP sa pagkuha sang mga armas nga may kinetic capabilities, ukon mga sistema nga gindisenyo para maigo kag maguba ang mga target.

Apang, wala niya ginhingadlan kun ano nga espesipiko nga klase sang missile ang ila baklon.

Ginhimo ni Nafarrete ang pahayag sa pagbukas sang ika-10 nga AFP Joint Exercise Dagat, Langit at Lupa (AJEX Dagitpa).

Suno sa AFP, importante ang pagpalig-on sang depensa bangod sa kapuluan nga heograpiya sang Pilipinas kag sa panginahanglan nga maproteheran ang kadagatan sang pungsod.

Ginpabutyag man nga magapadayon sila sa active defense approach.

Madumduman nga kabahin na sang AFP Modernization Program ang pagpalapad sang missile capabilities sang militar, lakip ang pagbakal sang BrahMos shore-based anti-ship missile systems halin sa India.