Patay ang apat ka Palestino sa separado nga mga pag-atake sang Israel sa Gaza, bisan pa nga yara na sa idalom sang ceasefire agreement ang rehiyon.
Tatlo sa mga biktima ang napatay matapos gin-igo sang Israeli drone ang isa ka van nga nagadala sang pagkaon para sa mga displaced residents sa Tal al-Hawa, Gaza City.
Apang, ginpahayag sang World Central Kitchen nga indi kaalyado sa ila ang nasambit nga salakyan, bisan may nakita nga dokumento nga may logo sang organisasyon.
Sa separado nga insidente, ginpatay ang isa ka Palestino matapos maigo sang lupok sa Halawa displacement camp.
Tatlo pa ka persona ang napilasan sa isa ka pag-atake sa Khan Younis.
Samtang, nagalala pa ang humanitarian crisis sa Gaza bangud sang mabaskog nga ulan kag pagbaha nga nagapabudlay sa kabuhi sang mga pamilya nga nagaestar sa temporaryo nga mga tolda.
Nagpahayag man ang World Food Programme nga may mga residente nga napilitan magsunog sang basura agud makaluto sang pagkaon.
Masobra 100,000 man ka tolda nga yara sa Egypt ang wala pa makasulod sa Gaza bangud sang mga restriksyon.
Base sa datos sang Gaza Health Ministry, 1,671 na ka Palestino ang napatay halin sang nagsugod ang ceasefire sang Oktubre 2025, nga nagapakita nga nagapabilin ang peligro kag pag-antos sang mga sibilyan sa rehiyon.













