Gin-aprubahan ni Senate impeachment court Presiding Officer Francis “Chiz” Escudero ang mosyon ni Senator-Judge Erwin Tulfo nga magpagwa sang show cause order batok kay Atty. Paolo Panelo, spokesperson ni Vice President Sara Duterte, bangud sa iya mga pamahayag nga nagakwestyon sa mga senator-judge.
Antes ang presentasyon sang bag-o nga defense witness nga si DTI Undersecretary Ceferino Rodolfo, gin-usisa ni Tulfo kon mahimo maghimo sang aksyon ang impeachment court batok kay Panelo, nga padayon sa pagkomento sa mga senador bisan indi ini kabahin sang trial.
Suno kay Tulfo, mahimo nga paglapas sa pagtahod sa impeachment court ang amo nga mga pahayag. Madumduman nga gin-akusaran ni Panelo sanday Senators Erwin Tulfo, Francis “Kiko” Pangilinan kag Risa Hontiveros nga nagapakita sang pag-apin batok kay Duterte matapos kwestyunon ang kredibilidad sang defense witness nga si Atty. Rainer Dela Fuente.
Gin-insister man ni Panelo nga responsibilidad sang prosecution panel, kag indi sang mga senator-judge, ang pagkwestyon sa kredibilidad sang mga testigo.













