-- ADVERTISEMENT --

Ginapabugal kag ginakalipay sang fashion designer nga si Jearson Demavivas ang pagpaambit sang iya malampuson nga journey sa industriya sang fashion, nga nagsugod sa Syudad sang Koronadal, ang lugar nga iya gindak-an.

Sa interview sang Bombo Radyo Koronadal, ginpahayag ni Demavivas nga sa Koronadal nahanas ang iya talento kag abilidad sa pagtahi kag fashion designing, nga nangin pundasyon sang iya pagpanikasog agud maabot ang handum nga mangin malampuson sa amo nga industriya.

Suno kay Demavivas, dako ang papel sang iya pamilya sa paghanas sang iya talento.

Ang iya amay isa ka mangunguma, samtang ang iya iloy nagabaligya sang mga linuto nga sud-an agud masuportahan ang panginahanglanon sang ila pamilya.

Ginpaambit man niya nga gin-gamit niya ang makina sa pagtahi sang iya iloy agud mapauswag ang iya abilidad sa pagtahi.

Nangin paagi man ini Demavivas agud makabulig sa pagbayad sang iya tuition samtang nagatuon pa sa isa ka buluthuan sa syudad.

Gin-admiter ni Demavivas nga bangud sa kapigaduhon sang ila pamilya, wala siya sang tion nga makakuha sang pormal nga edukasyon ukon propesyonal nga kurso sa fashion designing.

Apang wala ini nangin balabag sa iya handum nga mag-uswag sa industriya sang fashion.

Sa baylo, nangin inspirasyon ini sa iya agud padayon nga pauswagon ang iya talento, magpanikasog kag handumon ang mas mataas nga mga oportunidad.