Ginpanginwala sang Moro National Liberation Front (MNLF) ang mga nagalapta nga espekulasyon nga yara sa idalom sang proteksyon sang ila organisasyon si Senador Ronald “Bato” dela Rosa agud malikawan ang pagdakop sa iya.
Sa pahayag sang MNLF Information Committee, gin-athag sang grupo nga wala sila sang kumpirmado nga impormasyon ukon ebidensya nga yara sa ila kustodiya ukon ginatago ang senador. Wala man suno sa ila sang pormal nga relasyon sa tunga ni Dela Rosa kag sang organisasyon.
Ginpahayag sang MNLF nga ang una nga mga pagmitlang sang senador parte sa grupo may kaangtanan sa iya eksperyensya sang nagatuon pa siya sa Marawi, lakip na ang iya pagsuporta sa mga programa para sa mga anay mandirigma kag sa ila mga kabataan.
Bisan ginakilala sang organisasyon nga may mga kakilala si Dela Rosa nga personalidad nga may kaangtanan sa MNLF, ginpabutyag sini nga indi ini bastante nga basehan agud makasiling nga miyembro, alyado ukon ginaprotektahan sang grupo ang senador.
Samtang, nagpabilin nga wala pa nahibaluan ang eksakto nga kinaradtuan ni Dela Rosa samtang padayon siya nga ginapangita sang mga awtoridad may kaangtanan sa warrant of arrest nga ginpagwa sang International Criminal Court (ICC).
