Halos tatlo ka bulan nga nagpatigayon sang konsultasyon kag executive meetings ang lokal nga gobyerno sang Tampakan kaupod ang mga hog raisers kag meat vendors antes nagpagwa sang Executive Order nga nagatuyo sa pagsolbar sang isyu sa presyo sang karne sang baboy sa banwa.
Sa interview sang Bombo Radyo Koronadal, ginpahayag ni Tampakan Mayor Leonardo Escobillo, RN, nga ang nasambit nga Executive Order resulta sang sunod-sunod nga paghinun-anon sang duha ka sektor agud makab-ot ang makatarunganon nga presyo nga indi makapaluya sa pangabuhian sang mga hog raisers kag meat vendors.
Madumduman nga nag-alsa sang panawagan kag protesta ang mga hog raisers tuhoy sa pagpasaka sang presyo sang liveweight nga baboy, lakip na ang ila pagkabalaka sa padayon nga importasyon sang karne sang baboy halin sa iban nga pungsod.
Bangud sini, gintawag ni Escobillo ang mga hog raisers kag meat vendors agud mahisgutan ang ila tagsa ka concerns kag matalakay ang posible nga mga solusyon sa problema nga ginaatubang sang duha ka sektor.
Suno sa alkalde, wala gilayon nagdesisyon ang lokal nga gobyerno kundi gintimbang anay ang mga bentaha kag disbentaha, lakip ang posible nga positibo kag negatibo nga epekto sang tagsa ka ginapanukala nga tikang.
Ginpabutyag man niya nga importante nga mabalanse ang interes sang duha ka sektor agud masiguro nga wala sang malugi sa mga hog raisers kag meat vendors, samtang mapabilin nga makatarunganon ang presyo sang karne sang baboy sa merkado.
