-- ADVERTISEMENT --

Ginhangkat ni House prosecution panel member kag Manila Representative Joel Chua ang kampo ni Vice President Sara Duterte nga ipaathag ang gina-alegar P319 milyones ka pesos nga remittances halin sa China kag nagalab-ot sa P4.4 bilyones ka pesos nga financial transactions nga may kaangtanan sa mag-asawa nga Duterte-Carpio kag sa ila mga konektado nga negosyo.

Suno kay Rep. Chua, mas dalagko ini nga isyu nga dapat sabton sang depensa samtang nagapadayon ang impeachment trial batok sa Bise Presidente.

Base sa testimonya sang Anti-Money Laundering Council ukon AMLC, nakabaton kuno ang Cale88 Foods Corporation, kun sa diin may 47.5 percent interest ang bana ni VP Sara nga si Atty. Manases Carpio, sang sobra P319 milyones ka pesos nga remittances halin sa mainland China kag Hong Kong. Lakip man sa report sang AMLC ang ginabanta P4.4 bilyones ka pesos nga mga transaksyon sa tunga sang tuig 2007 tubtob 2025 nga ginakabig nga may kaangtanan kanday Duterte kag Carpio.

Gin-kwestyon ni Chua kun ngaa nakatutok ang mga testigo sang depensa sa pagpaathag sang mga galastuhan sa pagkaon sa Japan kag pagbakal sang sapatos nga nagabalor sang 200 mil pesos, imbis nga sabton ang mas dalagko nga transaksyon.

Dugang pa niya, wala pa gihapon napanginwala sang depensa ang mga alegasyon sang prosekusyon, lakip na ang isyu nahanungod sa indi mapaathag nga manggad sang Bise Presidente.