Nagapati ang House prosecution panel nga tion na agud mahibaluan sang publiko ang resulta sang impeachment proceedings batok kay Vice President Sara Duterte matapos ang pila ka tuig nga imbestigasyon kag mga proseso nga ginpatigayon sang Kongreso.
Ginpahayag ni House lead prosecutor kag Batangas Representative Gerville Luistro nga nagakaigo lamang nga mahibaluan kag masaksihan sang publiko ang resulta sang impeachment trial.
Suno kay Luistro, malawig na nga ginasubaybayan sang mga Pilipino ang mga imbestigasyon kag hearing may kaangtanan sa mga alegasyon batok sa Bise Presidente, gani dapat na nga makabaton ini sang klaro nga konklusyon.
Dugang pa sang mamalidha, indi lamang ang mga partido nga nagaulamid sa kaso ang may kinamatarong nga makahibalo sang resulta kundi pati ang bug-os nga pumuluyo nga dugay na nga nagahulat sa katapusan sang proseso.
Una na nga ginpahayag ni Luistro nga handum sang prosecution panel nga makabaton sang desisyon ang Senate Impeachment Court antes mag-abot ang Pasko, bisan ano pa ang mangin resulta sini.
Samtang, natalana nga magpadayon ang impeachment trial sa Nobyembre 19 matapos ang temporaryo nga pagpahuway sang mga hearing bangud sa pag-host sang Pilipinas sa ASEAN Summit.
Sa karon, ang Article II na lamang sang impeachment complaint ang ginatalakay sa trial, nga nagasentro sa ginapahayag nga indi maathag nga ginhalinan sang manggad ni Duterte, indi pagdeklarar sang iya mga pagkabutang kag indi pagbiya sa iya mga interes sa negosyo.
