Usisaon sa masunod nga hearing sang House Committee on Justice, ang kaundan sang income tax returns ni Vice President Sara Duterte kag sang iya bana nga si Atty. Manases Carpio, matapos ginkumpirmar sang komitiba nga ginpasa na sila sang Bureau of Internal Revenue.
Suno kay Justice Committee Chairperson Rep. Gerville Luistro, nangin moot na ang petisyon nga ginpasaka ni Carpio sa Quezon City Regional Trial Court sadtong Abril 13 nga nagatinguha nga punggan ang komitiba sa pagkuha kag pag-publish sang ila ITR.
Madumduman nga nagreklamo si Carpio sa ginpaguwa nga subpoena sang komitiba batok kay BIR Commissioner Charlie Mendoza, sa diin kinahanglan nga magsumiter ini sang tax documents may kaangtanan sa mag-asawa kag sa ila mga negosyo.
Ginpabutyag nila nga ini isa ka paglapas sa Data Privacy Act kag tuman ka sobra, ilabi na nga ang termino ni Duterte nagsugod lamang sang Hunyo 30, 2022.
Ang nasambit nga ITR ang pormal nga igapresentar sa hearing sang komitiba sa Abril 22.
Ginalauman man ni Luistro nga maistoryahan sa BIR ang mga limitasyon pag-abot sa confidentiality sang nasambit nga mga dokumento.
Samtang, ginklaro sang mamalidha nga nagpanawagan lamang ang komitiba sang report gikan sa Anti-Money Laundering Council (AMLC) para sa natalana nga hearing sa Miyerkules angut sa alegasyon sang wala mapaathag nga manggad batuk sa Bise Presidente.
Ang ginapangayo nga mga dokumento nagasakop sang mga sakop nga transaksyon ukon kantidad nga P500,000 pataas, subong man sang mga makaduluda nga transaksyon nga obligado sang mga bangko nga i-report sa AMLC ano man ang balor sini.
