Pagasugudan na sa Lunes ang pagtalakay sangang Article II ukon ang isyu sang unexplained wealth matapos matapos sang prosecution ang pagpresentar sang ebidensiya bahin sa alegasyon sang pag-abuso sa confidential funds.
Suno kay Prosecution legal spokesperson Atty. Benjamin Tolosa, usisaon diri ang mga bank account ni Vice President Sara Duterte, lakip ang mga rekord sang Bureau of Internal Revenue (BIR) kag Anti-Money Laundering Council (AMLC).
Ginahandum man sang prosecution nga mapadasig ang trial paagi sa pagpangabay sa depensa nga kilalahon ang authenticity sang mga dokumento sa bangko.
Ginpahayag man nga indi na igapresentar sang prosecution ang dugang nga mga testigo bahin sa confidential funds bangud nagapati sila nga bastante na ang mga ebidensiya nga nahatag sang mga nauna nga testigo.
Suno kay Tolosa, nakahatag na sang importante nga impormasyon ang mga bank manager, Special Disbursing Officers, COA auditors kag PSA officials parte sa mga isyu nga gin-atubang sang OVP kag DepEd.
Lakip sa mga ginpresentar nga isyu ang cash withdrawals, ginapatihan nga paglapas sa accounting rules, kakulangan sang mga resibo kag mga ngalan sa acknowledgment receipts nga wala sang katumbas nga rekord sa PSA.
Bangud sini, indi na kinahanglan sang prosecution nga magpresentar pa sang dugang nga mga testigo bangud mahimo lamang nga magbalik-balik ang ila mga testimonya.
Ginpahayag ni Tolosa nga naabot na sang prosecution ang ila evidentiary targets agud mapamatud-an ang alegasyon sang malain nga paggamit sang confidential funds batok kay Vice President Sara Duterte.
Samtang, bukas gihapon ang Article I agud makatawag sang dugang nga mga testigo ang mga senator-judges kun makita nila nga kinahanglan ini sa pagdesisyon sang kaso.
