Ginkwestyon ni Manila 6th District Rep. Bienvenido Abante Jr. ang presensya ni Vice President Sara Duterte sa tunga sang pagbaha kag epekto sang malain nga panahon sa nagkalain-lain nga bahin sang pungsod.
Nagpamangkot si Abante, “Diin na subong ang Vice President?” samtang nagaatubang sang kalamidad ang madamo nga komunidad.
Suno sa iya, kinahanglan magpakita sang presensya ang mga lider sang gobyerno sa tion nga nagakinahanglan sang bulig ang mga apektado nga residente.
Nagpanawagan man si Abante kay Duterte nga magatubang na sa Impeachment Court agud matapos na ang mga isyu nga ginapaabot batok sa iya.
Suno sa mamalidha, dapat atubangon sang bise presidente ang proseso kag hatagan sang sabat ang mga alegasyon batok sa iya.
Ginpahayag ni Abante nga importante ini bangud milyon-milyon nga pondo sang pungsod ang ginagasto sa nagapadayon nga impeachment proceedings.
Gani, ginaduso niya nga dapat mapadayon kag matapos sa husto nga paagi ang proseso sa Senado bilang impeachment court.
Samtang, nagapadayon ang pagbaha sa pila ka lugar sa pungsod bangud sa mabaskog nga pag-ulan.
Nagapadayon man ang mga ahensya sang gobyerno sa paghatag sang bulig sa mga residente nga naapektuhan sang kalamidad.
Ginpahanumdom ni Abante nga kinahanglan magtuman sang ila responsibilidad ang mga opisyal sang gobyerno, ilabi na sa tion sang krisis.
