Nagapabilin sa ika-11 nga pwesto ang Region 12 sa Palarong Pambansa 2025, base sa pinakaulihi nga resulta sang medal tally count.
Suno kay Magdaleno ‘Jojo’ Duhilag Jr., Regional Sports Officer sang DepEd Region 12, wala nakakontribyutar sa medalya ang pipila ka sporting events pareho sang dance sports, taekwondo, kag individual events, nga isa sa mga rason sang pagnubo sang ranggo sang rehiyon.
Ginpahayag man ni Duhilag nga isa sa mga nakita man nga kakulangan amo ang sistema sang pagdumala sang mga trainers. Suno sa iya, may trainers man ang kada division, apang nakita nga kinahanglan ire-align ukon iredesign ang programa pakadtu sa isa ka komon nga handum para sa bug-os nga rehiyon.
Ginpakita man nga ang kalayo sang mga venues kag ang indi maayo nga panahon ang mga nagdugang nga hinungdan sa kabudlayan sang mga atleta kag sa performance sang Region 12.
Madumduman nga yara sa ika-8 nga pwesto ang Region 12 sa Palarong Pambansa 2024, rason nga ginakabig subong nga isa ka setback ang resulta sa 2025, apang isa man ka oportunidad nga makabawi kag makapreparar pa gid sang mas maayo sa masunod nga edisyon sang Palarong pambansa.
