Nagsampa ng libel complaints ang nakakulong na Pastor Apollo Quiboloy laban kina Senator Risa Hontiveros, Akbayan Party-list Representative Perci Cendaña, at ML Party-list Representative Leila de Lima.
Kinumpirma ng tatlong mambabatas ang mga reklamo ngunit iginiit nilang hindi sila matatakot sa legal na hakbang ni Quiboloy.
Sinabi ni Hontiveros na mananatili siyang sumusuporta sa mga indibidwal na nagpakilalang biktima at humarap sa mga pagdinig ng Senado. Tinawag naman ni de Lima na walang sapat na basehan ang reklamo, habang sinabi ni Cendaña na magpapatuloy sila sa paghahangad ng hustisya para sa mga nag-akusa kay Quiboloy.
Samantala, tinawag ng Akbayan Party-list na “laughable” ang mga reklamo at iginiit na naninindigan sila sa mga testimonya at legal records na inilahad laban sa pastor.
Kasalukuyang nililitis si Quiboloy sa Pilipinas sa mga kasong kinabibilangan ng qualified human trafficking at sexual abuse. Hinihiling din ng Estados Unidos ang kanyang extradition kaugnay ng hiwalay na mga kasong sex trafficking, conspiracy at bulk cash smuggling, na sumasailalim pa sa proseso ng pamahalaan.
