Nagpanawagan si Police Colonel Isralene Lauren, Provincial Director sang South Cotabato Police Provincial Office, sa mga residente nga magpartisipar sa blood donation activities agud mabuligan ang mga pasyente nga nagakinahanglan sang dugo.
Sa interview sang Bombo Radyo Koronadal, ginpahayag ni Lauren nga nalipay ang katapo sang kapulisan nga nangin kabahin sang Dugong Bombo bloodletting activity bangud isa ini ka oportunidad nga makabulig kag makaluwas sang kabuhi.
Dugang pa niya, indi lamang ang mga pasyente ang makabenepisyo sa blood donation bangud may screening man nga ginahimo sa mga donor agud mahibaluan ang posible nga problema sa ila panglawas.
Ginpahayag ni Lauren nga bisan indi siya regular nga blood donor, nagapartisipar siya kon may kahigayunan kag nagabulig man sa mga kakilala nga nagakinahanglan sang dugo paagi sa pagdonar ukon pag-refer sang donors.
Gani, gin-awhag niya ang mga residente sa syudad sang Koronadal kag mga kaiping nga mga lugar nga magdonar sang dugo samtang may kahigayunan, bangud mas maayo nga mangin handa sa pagbulig sa iban antes pa mag-abot ang tion nga ang kaugalingon ukon pamilya ang magkinahanglan sini.
Suno sa iya, ang pagdonar sang dugo isa ka simple apang makahulugan nga tikang nga mahimo makadugang sang kahigayunan nga maluwas ang kabuhi sang iban.
