KORONADAL CITY – Nakuhaan suno pa sang video ang insidente sang pagpapangluthang batuk sa isa ka tribu sa Barangay Landan, banwa sang Polomolok, South Cotabato.
Sandig sa inisyal nga impormasyon, involbado diri ang isa ka pulis nga ginaaligar bodyguard sang alkalde sang banwa kag security sang kumbuyuhan nga Dolefil .
Makit-an sa video ang paglagas sang nasambit nga pulis kag security sa tribu kag mabatian man ang asod-asod nga lupok.
Isa sa mga katapu sang tribu ang mabatian pa nga nagahingyo sa pulis kag kaupod sini nga untatan na ang pagpangluthang bangud wala naman sang dala nga armas ukon patalom ang ginalagas nga biktima.
Sa subong, ginaimbestigahan pa ang insidente agud matumod ang motibo ukon rason sang pagpangluthang, subong man kun sin-o ang mga indibidwal nga involbado, lakip na ang miyembro sang tribu nga ginalagas.
Samtang, sa isa ka social media post, ginpasiguro ni Governor Reynaldo Tamayo Jr. nga iya pagatutukan kag gilayon nga solusyunan ang hitabo subong man indi pagpalampason ang insidente.
Sa karon, ginahulat pa ang klaripikasyon kag pahayag sa bahin sang pulis subong man security sang kumbuyuhan kag sang biktima.
