Ginpasalig sang Philippine National Police (PNP) nga igahatag ang maximum tolerance sa tanan nga grupo nga nagapatigayon sang protesta kadungan sang ASEAN Summit sa pungsod.
Suno kay Police Brigadier General Allen Rae Co, hepe sang PNP Public Information Office, maid-id nila nga bantayan ang mga lugar sa diin ginalauman nga matabo ang protesta agud masiguro ang katawhay kag seguridad.
Ginhingyo man ni Co ang mga nagaprotesta nga hangpon ang ginapatuman nga mga tikang sa seguridad. Ginpahayag niya nga ang mga otoridad magapasilabot lamang kon may makita sila nga mga paglapas nga mahimo makatublag sa ASEAN Summit ukon makahatag sang risgo sa sini.
Nahibaluan nga una na nga nag-anunsyo ang pila ka mga militante nga grupo sang plano nga maghiwat sang protesta, kadungan sang pag-abot ni US President Donald Trump sa pungsod.
Samtang, masobra 23,000 ka mga pulis kag soldado ang gindeploy sa nagkalain-lain nga bahin sang National Capital Region bilang kabahin sang malapad nga pagpreparar sa seguridad para sa internasyonal nga pagtililipon.
