Nagpasalig ang Philippine National Police ukon PNP nga ipagamit sini ang tanan nga kinahanglanon nga kagamitan kag personnel agud masiguro ang kaluwasan kag seguridad sang mga magabantay sa ika-49 nga ASEAN Summit kag Related Summits.
Suno kay PNP Chief General Jose Melencio Nartatez Jr., nagapadayon ang preparasyon sang kapulisan para sa isa sa pinakamahinalungon nga internasyonal nga pagtigom nga pagahost sang Pilipinas.
Ginpahayag niya nga preparado ang PNP sa pagpatuman sang nagakaigo nga mga security measures, lakip na ang posibilidad sang pagdeklarar sang mas mataas nga alert status kun makita nga kinahanglanon ini suno sa sitwasyon kag resulta sang security assessment.
Ginalauman nga magatambong sa nasambit nga pagtigom ang nagkalain-lain nga lider sang mga pungsod, upod na si US President Donald Trump. Magasugod naman ang mga miting sa Nobyembre 16, nga nagakinahanglan sang hugot nga koordinasyon sa tunga sang nagkalain-lain nga ahensya sang gobyerno.
Samtang, ginpahayag ni Nartatez nga low-level threat pa lamang ang namonitor sang kapulisan sa karon. Apang, ginpasiguro niya nga indi ini rason agud magluya ang pagbantay kag preparasyon sang mga personnel.
Padayon nga ginahimo sang PNP ang pagplano kag pagkoordinar sa iban pa nga ahensya sang gobyerno agud masiguro nga may nagakaigo nga seguridad sa mga lugar nga pagahiwatan sang mga aktibidad.
Ginalauman nga paagi sa hugot nga koordinasyon, preparasyon kag pagbantay, masiguro ang malinong kag luwas nga pagpatigayon sang ASEAN Summit kag ang pagprotektar sa mga delegado, bisita kag publiko.
