Mahimo nga magsobra sa ila target nga tatlo ka milyon nga bag-o nga narehistro nga botante ang Commission on Elections (COMELEC) para sa 2028 National kag Local Elections, kasunod sang pagbaton sang halos 80,000 ka mga aplikasyon sa sulod sang una nga duha ka adlaw sang registration period.
Suno kay COMELEC Chairman George Erwin Garcia, ini nga numero mas mataas sangsa 20,000 ka mga aplikasyon nga narekord sa una nga duha ka adlaw sang pagparehistro sang Agosto 2025.
May yara man sang talalupangdon nga pagdamo sang mga 17- kag 18-anyos nga nagaparehistro, nga nagapakita sang ila interes sa pagpasakop sa palaabuton nga eleksyon.
Samtang, ginpaathag ni Garcia nga ang malawig nga pila sa mga registration sites—kaangay sang Luneta Park—ang isa ka bahin bangud sa mga estudyante nga nagakinahanglan sang voter certification agud matuman ang mga requirements sang buluthuan.
Sa karon, nagakoordinar ang COMELEC sa mga buluthuan agud maghingyo sang extension sang submission deadlines, agud masiguro nga may bastante nga tion ang mga estudyante agud matapos ang ila registration.
Magapadayon ang voter registration tubtob sa Hulyo 30, 2027. Tuyo sang ahensya nga makadugang sang tatlo ka milyon ka mga botante, nga nagadala sang kabug-usan nga numero sang mga rehistrado nga botante sa 74 milyones antes ang 2028 nga eleksyon.
