Nagpatanyag ang Estados Unidos sang balor nga tubtob $20 milyon nga pabuya sa bisan sin-o nga makahatag sang impormasyon nga makabulig sa pagdiskubre sang mga lugar sa Iran nga ginagamit sa paghimo sang nuclear weapons.
Paagi sa Rewards for Justice program sang US State Department, ginatanyag man sang Washington ang pagbalhin sang puluy-an para sa mga indibidwal nga makahatag sang importante nga impormasyon kag magabulig sa ila imbestigasyon.
Ang amo nga tikang ginpatuman kasunod sang nauna nga pahayag ni US President Donald Trump nga nadula na kuno ang mga nuclear facility sang Iran bangod sa operasyon sang militar sang Estados Unidos.
Samtang, nagtukod ang US Central Command sang Task Force Iron Gate nga magabase sa Tampa, Florida, agud mangin kabahin sa ila mga operasyon nga may kaangtanan sa seguridad kag nuclear program sang Iran.
Nagapati man ang US Central Command nga ang ila naval blockade nakapugong sa Iran nga makapasulod sang mga materyales nga mahimo gamiton sa paghimo sang nuclear weapons.
Suno sa panindugan sang Estados Unidos, kabahin sang rason sa pagpatanyag sang pabuya amo ang ginapahayag nga indi pagsunod sang Iran sa mga regulasyon kag kinahanglanon sang International Atomic Energy Agency (IAEA).
Padayon naman nga ginatutukan sang internasyonal nga komunidad ang tensyon sa tunga sang Washington kag Tehran bangod sa isyu sang nuclear development.
