Ginkumpirma sang Department of Foreign Affairs (DFA) nga may isa ka Pinay sa Riyadh, Saudi Arabia nga nalakip sa masobra 900 nga napatay sa hajj pilgrimage nga ginpatigayon sa tunga sang tuman nga init nga tyempo.
Heatstroke ang rason suno kay DFA Undersecretary Eduardo de Vega.
“So far, only one female Riyadh-based Filipino pilgrim died of natural causes (heatstroke) in Makkah,” kumpirmasyon sini.
Ini nga Filipina ang nalubong na sang nagligad nga Myerkules.
Base sa data sang ahensya, may yara sang 5,100 Filipino pilgrims subong nga tuig — malapit sa figure nga gin-release sang National Commission on Muslim Filipinos (NCMF) nga may 5,060 Filipino Muslims nga naglupad sa Saudi para magtambong sa Hajj pilgrimage.
Nakapadala naman ang DFA sang team sa Saudi Arabia agud nga magbulig sa embahada sang Pilipinas sa pag-monitor kag paghatag assistance sa pilgrims subong nga tuig.
Nahibaluan nga may mga missing pa subong kadungan sang amo nga aktibidad.
Kasunod ini sang na-rekord nga 51.8 degrees Celsius nga temperatura sa Mecca nga amo ang holiest city sang Islam sa Saudi Arabia sang nagligad nga Lunes.
Ginabanta yara sa 1.8-million ka mga tawo halin sa nanuhay-tuhay nga mga pungsod ang nagpasakop sa inadlaw nga pilgrimage nga kalabanan ginpatigayon sa guwa apisar pa nagatagiti ang init.
May isa ka Arab diplomat nga nagkumpirma nga sa Egyptians pa lamang, nagtimbuok na sa “at least 600” ang napatay nga mas mataas sa 300 nga na-report sang nagligad nga adlaw.
Lakip sa na-report nga missing amo ang wala na-rehistro kag wala sang official hajj permit rason nga wala naka-access sa air-conditioned facilities kun sa diin makapabugnaw kuntani ang pilgrims.
Sa subong ginabaha ang Facebook kag iban pa nga social media networks sang mga laragway sang mga missing kag sang mga hingyo ngamagpaguwa na sang dugang nga mga impormasyon.
Nahibaluan nga ang hajj ang isa sa lima ka pillars sang Islam kag ang timing sini ang ginatumod sang Islamic lunar calendar.
