Opisyal nga nag-umpisa na kahapon sang Mayo 21 ang Philippine Coffee Quality Competition (PCQC) 2026 sa Sultan Kudarat Convention Center sa Tacurong City, kung sa diin ginpabugal ang mga de-kalidad na lokal nga kape halin sa magkalain-lain nga bahin sang pungsod.
Ginpangunahan sang Department of Trade and Industry Region 12 ang nasambit nga aktibidad upod ang mga local government units, coffee industry partners, academe, kag private sector stakeholders agud mapasanyog ang industriya sang kape sa pungsod.
Tumong sang PCQC nga hatagan sang panginbulahan ang mga Filipino coffee farmers kag producers samtang ginaawhag ang pagpasangkad sang coffee production kag pagpalapnag sang market opportunities sang Philippine coffee sa International Market.
Sa record sang organizers, masobra 135 coffee entries ang nagpasakop halin sa magkalain lain nga rehiyon kasubong sang Ilocos Region, SOCCSKSARGEN, Northern Mindanao, Davao Region, kag Bangsamoro Autonomous Region in Muslim Mindanao.
Sa kabug-usan, 110 ang robusta entries, 19 ang arabica, apat ang excelsa, kag duha ang liberica, samtang may tatlo pa nga ginalauman nga madugang nga entries.
Kasabay sang pagbukas sang kompetisyon, nagpatigayon man sang pagpanagtag sang fertilizer kag farm inputs para sa mga coffee farmers kag naghatag man sang halal certificates sa pila ka coffee businesses.
Magatakop naman sa Mayo 29 ang aktibidad sa Sultan Kudarat kung sa diin ipatigayon ang green coffee grading kag roasting sang mga entries antes dalhon sa Makati City para sa finals cupping sa Hunyo 2 tubtob 3. Ginalauman naman nga iga-anunsyo ang mga magdaog nga entries sa Hunyo 5.
See less
