Bistado kag kumpirmado ang isa ka lalaki sa Purok Rizal, Brgy. Concepcion, Koronadal City kag ginapaidalum na sa karon imbestifasyon subong matapos magpahayag sang isa ka insidente sang pagpang hold-up , nga karon ginpamatud-an nga peke kag ginhimo-himo lang.
Suno sa 22-anyos nga Kin Clair Soliva siya kuno ang biktima sang hold-up sa Bo. 4, alas-7:15 sang gab-i. Apang sa baylo nga matuod nga krimen, nagpadulong siya mismo sa pulisya kag nag-ako nga peke ang tanan.
Suno sa salaysay niya, residente siya sang Purok Malipayon, Barangay Topland, kag gin-ako niya nga wala siya ginhold-up kundi ginbayad niya ang P19,000 nga kwarta sang iya iloy nga OFW sa utang nga iya gin-utang.
Siya man mismo ang nagpilas sa iya tiyan kag wala kuno sang duwa ka lalaki nga nagbuno sa iya, kabaliskaran sang una niya nga ginpahayag.
Nagpangayo sang pasaylo si Soliva sa mga pulis kag sa publiko sa ginpatuga niya nga kasaysayan.
Sa karon, padayon ang imbestigasyon sang mga otoridad, kag ginakonsiderar ang posibilidad nga pasakaan siya sang kaso bangud sa pagsaylo sang istorya kag pagpakuno-kuno nga biktima sang krimen.
