KORONADAL CITY – Hustisiya ang ginasinggit sang pamilya sang isa sa mga suldado nga napatay sa engkwentro sa rebelde nga NPA sa bahin sang Barangay Carabalan, Himamaylan City, Negros Occidental.
Kalakip si PFC Carl Venice Bustamante sa mga napatay sa nasambit nga engkwentro kaupod sanday 2nd Lt. Ralf Almante Abibico at Cpl. Joel Nobleza, lunsay mga katapo sang 94th Infantry Battalion, Philippine Army.
Sa eksklusibo nga interbyu sang Bombo Radyo Koronadal sa utod ni PFC Bustamante nga si Janjan, indi nila mabaton ang mapait nga nadangtan sang iya utod.
Suno sa iya, isa suno pa ka mabuot kag hipuson nga tawo si Carl kag breadwinner sa ila pamilya.
Tuman man ang pagpanalambiton sang nobya sini nga si Sheryl Villanueva sa pagkapatay sang 24 anyos nga suldado.
Ginsaysay ni Sheryl nga ulihi sila nga nag-istoryahanay takna alas 9 sang aga kag wala siya naglaum nga amo yadto ang ulihi nila nga pag-istoryahanay makaligad nagluntad ang engkwentro takna alas 10.
Natalana kuntani ang ila kasal sa bulan sang Abril sa madason nga tuig.
Hangyo sang pamilya subong ang madasig nga pagdul-ong sang bangkay sini sa Brgy. Dajay sa banwa sang Surallah.
Ginkondenar naman ni Surallah Mayor Antonio Bendita ang nagluntad kag ginpasiguro ang nagakaigo nga bulig sa mga nabilin sang suldado.
