Nagpaandam ang Philippine Space Agency (PhilSA) nga posible nga nahulog sa katubigan nga sakop sang exclusive economic zone kag archipelagic waters sang Pilipinas ang debris sang Long March 7A rocket nga ginlunsar sang China.
Sa ila ginpagwa nga pagpaalinton, ginpabutyag sang ahensiya nga posible nga magtupa ang rocket debris sa mga drop zones nga ginabana-bana nga 41 nautical miles halin sa Burgos, Ilocos Norte; 62 nautical miles halin sa Dalupiri Island, Cagayan; 69 nautical miles halin sa Santa Ana, Cagayan; kag 81 nautical miles halin sa Camiguin Norte.
Bisan pa nga wala ginapaabot nga magtupa ini sa kalupaan ukon sa mga panimalay, ginpahanumdom sang PhilSA nga posible ini magdala sang halit sa mga barko, eroplano, bangka sang mga manugpangisda, kag iban pa nga nagalabay sa mga apektado nga lugar sa dagat.
Suno sa ahensiya, ginlunsyar ang nasambit nga rocket halin sa Wenchang, Hainan alas-12:16 sang kaagahon sang Miyerkules, Mayo 27.
Ginpaandam sang PhilSA ang publiko nga gilayon ipahibalo sa mga otoridad kun may makit-an nga kahalitan ukon debris, kag ginapahanumdom man nga indi ini dapat palapitan ukon kuhaon bangud posible ini nagaunod sang delikado nga kemikal kasubong sang rocket fuel.
